भय,गुढ,रोमहर्षक या विषयी वाचण्याची आवड ठेवणाऱ्यांसाठी.

 

शाडूचा शाप

 

                                          लेखक - नारायण धारप.

 

त्यांच्या रहस्यमय आणि गूढ लेखनाने त्यांनी वाचकांच्या मनावर वेगळीच भुरळ घातली आहे. आजच्या पिढीसाठी त्यांचं नाव नवीन असेल पण त्यांच्या लिखाणाने एक काळ गाजवला होता. ज्या काळामध्ये दूरदर्शन आणि इतर प्रसारमाध्यमांची फारशी चलती नव्हती तेव्हा सामान्य वाचक त्यांच्या लेखनाची आतुरतेने वाट बघायचा. आजच्या सोशल मीडियाची क्रेझ असलेल्या पिढीलासुद्धा ऐवढीच ओढ लावायची ताकद त्यांच्या लिखाणात आहे. रहस्यमय आणि गूढ लेखनाच्या अव्वल स्थानी असणारे आणि वाचकाला त्यांच्या लेखणीद्वारे शेवटपर्यंत खेळवत ठेवणारे लेखक म्हणजे आदरणीय नारायण धारप.

नारायण धारप यांच्या अशाच रहस्यमय आणि गूढ लिखाणामधील एक कथासंग्रह मी आज तुमच्या भेटीला घेऊन आलो आहे. 'शाडूचा शाप'.१११ पानाच्या या पुस्तकामध्ये एकूण पाच कथा आहेत. प्रत्येक कथा ही भन्नाट आणि अर्थपूर्ण आहे. लेखक नारायण धारप यांचे लिखाण वाचकाच्या मनाचा ठाव घेते. ते वाचकाला कथेसोबत धरून ठेवतात.

 'कुतूहल' माणसाच्या स्वभावाला जडलेला आजार आहे असं म्हंटलं तर ते वावगं ठरणार नाही. कारण या कुतूहलापोटी माणूस त्याला पडलेल्या विविध प्रश्नांचा,घटनांचा शोध घेतो. त्याच्या मूळापर्यंत किंवा त्याच्या तर्कापर्यंत जाण्याची त्याला खूप उत्सुकता असते. याच विषयाला धरून 'शाडूचा शाप' या कथा संग्रहातील प्रत्येक कथा आहे. 'शाडूचा शाप' या कथेची मांडणी आणि विषय खूप वेगळा आहे.

 जन्माला आलेल्या जुळ्या मुलांपैकी एक मूल मृत जन्माला येतं आणि त्याच्या मृत्यूचे कारण हे की त्याच्या जुळ्या भावानेच त्याला आईच्या गर्भामध्ये मारलेलं असतं. तर आता हा नेमका शाडूचा काय शाप आहे, हे जाणून घेण्यासाठी ही कथा जरूर वाचली पाहिजे.

दुसरी कथा आहे 'जाग'. वर म्हंटल्याप्रमाणे माणूस कुतुहलापोटी कधी कधी चुकीच्या गोष्टी करून जातो आणि नको ते संकट आपल्या पदरी पडून घेतो. कथेचे नायक प्रो.कारखानीस हे याच कुतूहलाच्या मोहाला बळी पडतात. एकदा ते  'चिंची' या गावी एका शिरवाडकर नामक व्यक्तीचा वाडा काही दिवसांसाठी भाड्याने घेतात. आणि याच वाड्यामध्ये एक विचित्र प्रकार त्याच्या सोबत  पुढचा थरार वाचायला मिळतो.

तिसरी कथा आहे, 'आपुले मरण'. एक निवेदक ही कथा सांगत आहे त्याच्या डॉक्टर मित्राला आलेल्या अनुभवाची. सरकारी हॉस्पिटल मध्ये काम करणाऱ्या डॉक्टर मित्राची ओळख त्याच्या एका पेशंट सोबत होते. या पेशंटला जेव्हा वेगळ्या वॉर्ड मध्ये भरती करायचे असते तेव्हा तो अशी काही गोष्ट त्या डॉक्टरला सांगतो ज्याने तो संभ्रमामध्ये पडतो. त्या गोष्टीवर विश्वास ठेवायचा तर त्याला त्याचा डॉक्टरी पेशा मान्यता देत नसतो. कोणती आहे ती गोष्ट...? काय होतं ते रहस्य..?

चौथी कथा आहे,'लक्ष्मी-कांचन',ज्यामध्ये कथेचा नायक आपल्या सेक्रेटरी सोबत लग्न करता यावे म्हणून आपल्या पत्नीला मारण्याची योजना आखतो. अत्यंत शिताफीने  तो हे कृत्य करतो पण पुढे जाऊन असे काही घडते ज्यामध्ये त्याचे संपूर्ण आयुष्य उध्वस्थ होते.

पाचवी आणि शेवटची कथा आहे, 'पुनरपि जन्म पुनरपि...', या कथेसाठी लेखकांचे विशेष कौतुक करावेसे वाटते. कारण कथेचा विषय इतका भन्नाट आहे की ज्यामुळे लेखक नारायण धारप यांचे लिखाण समृद्ध का असते हे समजून येते. विचार करा आपला घडून गेलेला भूतकाळ आपल्या चालू असलेल्या वर्तमानामध्ये  येऊन आपल्याला येऊ घातलेल्या भविष्यकाळाविषयी सांगत असेल,आपल्याला सावध करत असेल तर काय होईल. हे आपल्या फायद्याचे आहे ना..? म्हणजे ज्या चुका आपण भविष्यामध्ये करणार आहोत त्याची कल्पना आपल्याला मिळाल्यावर आपण त्या चुका सहज टाळू शकतो. आणि जर का आपण याकडे दुर्लक्ष केले तर....? याच गोष्टीकडे दुर्लक्ष केल्यामुळे कथेच्या नायकाची, सदाशिव याची जी अवस्था झाली तिचं आपली होईल......

पुस्तकामधील प्रत्येक कथा या निवेदन स्वरूपाच्या आहेत. प्रत्येक कथा कोणी तरी दुसरी व्यक्ती सांगत आहे. पुस्तकाची भाषा,शब्द रचना साधी सरळ आहे. त्यामुळे वाचनामध्ये सहजता येते. प्रत्येक कथा आणि त्याचा विषय अत्यंत भन्नाट असल्यामुळे पुस्तक बाजूला ठेवूस वाटत नाही. पुस्तकाचे मुखपृष्ठ संतुक गोळेगावकर यांनी साकारले आहे. पुस्तकांचे प्रकाशन साकेत प्रकाशन यांनी केले आहे. भय,गुढ,रोमहर्षक या विषयी वाचण्याची आवड ठेवणाऱ्यांसाठी. प्रत्येक वाचकाने जरूर वाचावे असे हे पुस्तक लेखन नारायण धारप लिखित 'शाडूचा शाप'.

प्रत्येक वयात आलेल्या व्यक्तीने वाचावे आणि सुजाण वाचकाच्या संग्रही असावे असे हे पुस्तक.

वाफाळलेले दिवस

                               

                                      लेखक - प्रतीक पुरी

 

 लैंगिकता या विषयी आपल्याकडे उघडपणे बोलले जात नाही. शरीरामध्ये होणारे बदल याविषयी सुद्धा उघडपणे विचारले जात नाही.आपल्याकडे लैंगिकता म्हणजे अश्लील,नाक मुरडला जाणारा,दबक्या आवाजात,चोरून बोलला जाणारा विषय आहे. या विषयी जनजागृती झाली तर त्यामध्ये समाजाचे कल्याणच होणार आहे याची जाण खूप कमी लोकांना आहे. या संदर्भात लैंगिक शिक्षणाचा प्रसार करणारे आदरणीय रघुनाथ धोंडो कर्वे यांच नाव आवर्जून घेतलं पाहिजे. 'लैंगिकता' या विषयावर त्यांनी आपले मत निर्भीडपणे मांडले. पण वेळप्रसंगी त्यांना लोकांच्या रोषाला सामोरे जावे लागले. आत्ता आत्ता कुठे  लैंगिकता या विषयावर जनजागृती होत आहे. विविध संस्थांच्या माध्यमातून,चित्रपट,नाटक,पुस्तकांच्या माध्यमातून या विषयावर प्रकाश टाकला जात आहे.'लैंगिकता' याच विषयावर आधारित एक पुस्तक घेऊन मी तुमच्या भेटीला आलो आहे. लेखक प्रतीक पुरी लिखित 'वाफाळलेले दिवस'.  

१७५ पानांच्या या पुस्तकाची कथा,कथेचा नायक जो आठवी इयत्तेमध्ये शिकणारा मुलगा आहे आणि तो नुकताच वयात आलेला आहे. तो या पुस्तकाची कथा आपल्याला सांगत आहे. कथा सांगतेवेळी तो स्वतःला 'आपण' असं संबोधित करतो. त्याच्या शरीरामध्ये होणाऱ्या बदलांविषयी तो सांगत आहे आणि याच सोबत त्याच्या शाळेतील त्याच्या मित्रांमध्ये होणारे शारिरीक बदल, आणि त्याच्या छोट्याश्या प्रेमाविषयीसुद्धा त्याने सांगितलं आहे.

वयात येणाऱ्या मुलामुलींना त्यांच्या शरीरात होणाऱ्या बदलांविषयी खूप प्रश्न पडत असतात. या सर्व प्रश्नांची उत्तरे त्यांना घरातून मिळतातच असं नाही. याचं कारण म्हणजे वर उल्लेख केल्याप्रमाणे लैंगिकता हा विषय आपल्याकडे उघडपणे बोलला जात नाही. पुस्तकाच्या कथेमध्ये नायकाला अशाच पद्धतीचे प्रश्न पडतात  (हे प्रश्नसुद्धा खूप गंमतीशीर आहेत उदा. मुलींमध्ये कोणकोणत्या विषयावर चर्चा होत असेल,त्या काय बोलत असतील..? असे आणि अनेक प्रश्न जे वयात येणाऱ्या मुलांना पडतात ते सर्व लेखकाने उत्तमरित्या पुस्तकामध्ये मांडले आहेत.) आणि त्याला त्याची काही उत्तरे त्याचा मित्र 'नित्या' (नित्यानंद) याच्याकडून मिळतात तर काही गोष्टींचे आकलन त्याचे त्याला होत जाते. शरीरामध्ये होणाऱ्या बदलासोबतच त्याच्या विचारांमध्येही बदल होत असतो. त्याच्या या विचारांनी मन थक्क होऊन जाते. कथेमध्ये येणारे प्रसंग खूप मनोरंजक आहेत. विशेष म्हणजे नायक आणि त्याच्या वडिलांचे संभाषण किंवा नायक आणि त्याचा मित्र नित्या यांच्यातील संभाषण.

पुस्तकाची भाषा अश्लील आणि शिवराळ जरी असली तरी ती आजच्या घडीला धरून आहे असं वाचताना वाटतं याच कारण म्हणजे आजकाल  मुलांच्या तोंडी अशीच भाषा ऐकायला मिळते. पुस्तकांच्या याच भाषेने आणि त्याला प्राप्त झालेल्या विनोदी स्वरूपामुळे लैंगिकता या विषयावर मार्मिक भाष्य झाले आहे. त्यासाठी लेखकाचे विशेष कौतुक.

पुस्तकाचे मुखपृष्ठ दिनकर जाधव यांनी साकारले आहे. या मुखपृष्ठाविषयी मांडलेलं मत आणि पुस्तकाचा आशय हे पूरक झालेले दिसून येते. पुस्तकाचे प्रकाशन 'गोल्डन पेज' यांनी केले आहे. प्रत्येक वयात आलेल्या व्यक्तीने वाचावे आणि सुजाण वाचकाच्या संग्रही असावे असे हे पुस्तक,लेखक प्रतीक पुरी लिखित 'वाफाळलेले दिवस'.