भीतीदायक भविष्याची सूचना देणारे पुस्तक. ऑन द बीच लेखक - नेव्हिल शूट

ऑन द बीच

लेखक - नेव्हिल शूट

                अनुवाद - लेखिक नंदा खरे.

 

 

मानवाला प्रगतीशील होण्याचे वरदान मिळाले. नवनवीन संशोधनाच्या माध्यमातून मानवाने स्वतःची आणि पर्यायाने समाजाची, देशाची प्रगती घडवली, या प्रगतीमधून संघर्ष केव्हा निर्माण झाला याचे त्याला भान उरले नाही. हा संघर्ष इतका उफाळून आला की त्याने युद्धाचे स्वरूप धारण केले. काही प्रगतीशील देशांनी देशाभिमानासाठी शेजारील देशावर बॉम्ब टाकून सत्ता मिळवण्याचा प्रयत्न केला आणि या युद्धाचे परिणाम निष्पाप लोकांना भोगावे लागले. दुसरे महायुद्ध याचे उत्तम उदाहरण आहे. सुप्रसिद्ध कादंबरीकार, स्टोरीटेलर नेव्हिल शूट यांची १९५६ मध्ये प्रकाशित झालेली, अनेक दशकं बेस्ट सेलर म्हणून गाजलेली 'ऑन द बीच' ही कादंबरी घेऊन मी आज तुमच्या भेटीला आलो आहे. भीतीदायक भविष्याची सूचना देणारी ही कादंबरी नेव्हिल शूट याच्या शेवटच्या पुस्तकांपैकी एक म्हणावी लागेल.

१९६ पानांच्या या पुस्तकाची कथा उत्तर गोलार्धामधील दोन देशांमध्ये भडकलेल्या अणुयुद्धाच्या परिणामाची आहे. यामध्ये उत्तर गोलार्धातील देश संपून जातात. हळूहळू तो किरणोत्सर्ग दक्षिणेकडे सरकू लागतो. दरम्यान या संकटामधून सुखरूप वाचला जातो तो स्कॉर्पियन या अमेरिकन पाणबुडीचा कॅप्टन टावर्ज आणि त्याचे सहकारी. ते आपली पाणबुडी घेऊन दक्षिण गोलार्धात म्हणजेच ऑस्ट्रेलियामध्ये येतात.  पुढच्या सहा महिन्यात किरणोत्सर्ग ऑस्ट्रेलियाला येऊन धडकणार याची माहिती त्यांना मिळते. युद्धाचे परिणाम हे ऑस्ट्रेलियाला दिसत असतात. या सहा महिन्याच्या काळात टावर्ज याची ओळख लेफ्टनंट कमांडर पीटर, मेरी, म्वारा, ऑसबोर्न याच्याशी होते. इतर अमेरिका आणि इतर उत्तर गोलार्धामधील देशांशी जिथे कोणी जिवंत आहे अशा देशांशी संपर्क साधण्याचे प्रयत्न सुरु असतो. दरम्यान सीऑट्रल या देशांमधून काही रेडिओ संदेश येत असल्याची माहिती मिळते. तिथे कोणीतरी अजून जिवंत आहे आणि ते मदतीसाठी संदेश पाठवत आहेत आणि त्यांच्या शोधासाठी स्कॉर्पियन निघते. या शोध मोहिमेमध्ये काही विलक्षण प्रकार घडतात, आणि ते कोणते हे जाणून घेण्यासाठी हे पुस्तक जरूर वाचले पाहिजे.

माणसाला आपल्या मृत्यूची कल्पना मिळताच तो स्वतःला वाचविण्याचा अतोनात प्रयत्न करतो. आपला मृत्यू निश्चित आहे हे जेव्हा त्याला समजते तेव्हा तो त्याला कठोर मनाने सामोरा जातो. तसेच जसजसे आपण या पुस्तकाच्या कथेच्या शेवटाकडे येतो,तसे आपल्याला काही मन पिळवटून टाकणाऱ्या गोष्टी वाचायला मिळतात. किरणोत्सर्ग ऑस्ट्रेलियामध्ये येऊन पोहचतात. किरणोत्सर्गाचा वाढत्या परिणामाने लोकांचे आरोग्य खालावत जाते. आजाराने लोक हळूहळू मृत्यूच्या जवळ जात असतात,पण हा येणारा मृत्यू अत्यंत वेदनादायक असतो. त्याच्या पासून सुटका मिळावी आणि आपले मरण सुलभ व्हावे म्हणून काही लोकं त्या लाल डबीतील गोळ्या घेऊन मृत्यूला शरण जातात, तर काही त्या त्रासदायक, वेदनादायक मृत्यूला सामोरे जातात. शेवटी उरत तर फक्त रिकामं शहर. जिथे सर्व गोष्टी आहेत, उंच उंच इमारती, हॉटेल्स, मैदाने, पाणी, वीज सर्व काही आहे पण हे सर्व भोगण्यासाठी माणूस नाही.....

पुस्तकाचे प्रकाशन 'मनोविकास प्रकाशन' यांनी केले आहे. पुस्तकाचे मुखपृष्ठ चंद्रमोहन कुलकर्णी यांनी साकारले आहे. या अफलातून कादंबरीचा अनुवाद लेखिका नंदा खरे यांनी केला आहे. पुस्तकाच्या प्रस्तावनेमध्ये नंदा खरे यांनी त्यांची या कादंबरी विषयीची ओढ  व्यक्त केली आहे. प्रत्येकाने वाचावे आणि प्रत्येकाच्या संग्रही असावे असे हे भीतीदायक भविष्याची सूचना देणारे पुस्तक लेखक नेव्हिल शूट लिखित 'ऑन द बीच'.